Gagn

Reprise på tomatbasen

2012-04-22T19:43:00.000+02:00

Det er rart med det; når ein bloggar tek ein bilete langt nedi maten. Og når vekene fyk, og bileta endeleg vert lagt over på pcen, er halve herlegheita oppeten. Eg har blogga om denne smørja før og ho er så genial at eg viar ho spalteplass nok ein gong. Framgangsmåten finn du her om du skulle ha god tid og ingrediensane tilgjengeleg, samt plass i fryseboksen.

Det eg til no har brukt av denne ladninga, har blitt til pizza. Ganske ok å tenkje på at både selleri og gulrøter har stupa ned i gryta og blitt til pizza-materiale.

Påskebodskap oppå ein bolle

2012-04-05T15:31:00.000+02:00

Me er i påskeveka. Det er sikkert mange som er på fjellet eller andre stader, men her i heimen "held me fortet" utan bil. Og då kan det bakast! I alle fall litt, no når sandkasse-sanden er blaut. Det vart eit brett med 12 engelske påskebollar i forsøk på å laga noko som kunne peila meg inn i påskemodus. Halverte denne oppskrifta frå bloggen Marias salt og søtt. Resultatet vart ganske ok. Eg brukte målebeger for å måle vekt, så det vart nok litt "på slomp". Mangla noko av krydderet som skulle oppi, men kompenserte med dei eg hadde i skapet. Neste gong ville eg kanskje hatt dei litt søtare. Dei vart litt semi-rundstykke, om de skjønar kva eg meinar. Men med Millom-brunosten min, kan vel dette gå godt?

DIY: Trappereir

2012-03-17T10:43:00.000+01:00

Ein skulle tru at pcen min var teipa saman etter sist innlegg på grunn av skjermfri veke og slike ting, men slikt er altså ikkje tilfelle. Kanskje til neste år...?

Påska nærmar seg og eg har laga eit reir for trappa/terassen. Enkel sak, men krev berre litt tid og eit minstemål av musklar. På same måte som trappetreet, er det lurt gå i gang med eit slikt prosjekt før blada sprett.

Du treng:

(Levande) kvistar (gjerne bjørk for større volum)

Tynn ståltråd.

Utstyr:

Lita hagesaks

Gummihanskar (dette prosjektet slit litt på hendene).

Ein startar med å lage ein ring av nokre kvistar (forskyv den eine noko i forhold til den neste). Når du tykkjer at lengda er fin, samlar du han til ein ring med ståltråden.
Vidare byggjer ein på, lag for lag. Eg ville ha mitt reir høgare enn breitt, difor bygde eg på kransen på toppen og ikkje på sidene.
Når kransen er stor nok, kan du vurdere om du skal fletta inn nokon form for pynt. Eg brukte nokre lerkekvistar med konglar på.
Fest ståltråden på undersida.

Dersom du har eit sinkfat/krukke til å setje inni reiret, kan det brukast som ei blomsterpotte.

Så då er det berre å gå tre på seg regnbuksa og ta turen ut i skogen væpna med hagesaks.
Lukke til!

DIY: Tape er gøy!

2012-02-24T23:17:00.002+01:00

Eller kanskje det heiter teip no? Har ikkje oppdatert meg hos Språkrådet i det siste. Fekk ein gjeng med washitape i posten her om dagen. Det er vel ikkje nokon bombe at dei kom frå ein Etsybutikk. Butikken heiter Kawaii Goodies og har tons of fine taperullar. Eg endte då opp med desse (Alle kjøpt på Etsy utanom den kvite med mintblå prikkar - den kjem frå Panduro). Pandurotapen verka "fastare i fisken" i forhold til dei andre og er kanskje litt vanskelegare å klistre på ei overflate som ikkje er heilt flat.

Eg brukte eit høgt glas, samt nokre barnematglas.

Vaska og tørka dei godt før eg starta dekoreringa.

Noko som var fint med tapen, var at det gjekk fint an å prøve og feile (altså flytte på tapebitane) utan at dei vart øydelagd.

Det går godt an å klippe tapebitane på langs for å få tynnare striper.

Som de ser, har baksida på mobilen min òg fått litt tape på seg.

Håpar washi-døgnfluetrenden varer til sauen min (sjå forrige innlegg) er stor nok til å klistre sjølv. Kanskje eg må handla inn eit svært tape-depot som kan liggja klar i eit bomberom (a la "Rik på rabatt" på TLC) til alderen er der og me kan gå i gang med å dekorera glas med traktor på (ops.. har visst allereie tørrtrent på det).

Uklar sau

2012-02-19T19:49:00.000+01:00

Denne veka var me på karneval. Det vil sei: berre ein av oss var utkledd. Det stod mellom sau og traktor. Og sidan eg berre hadde ein halvtime til å sy kostyme, vart det enklast med sau. Kanskje traktor neste år? To saueøyre og hale sydd av kvitt pelsstoff. Øyrene festa eg med sikkerhetsnåler på ei hettehue eg hadde kjøpt på ull-salg på slutten av sist vintersesong. Skinntøflar fungerte som "klauer". Guten sjølv (som har kalla alle på fire føter for "bæ" siste halvåret) lyste opp då han såg seg sjølv i spegelen. Bæ! Og så sette sauen opp eit voldsomt tempo som gjorde det umogleg å knipse klare bilete. I alle fall for meg!

Endå ein barselgåve

2012-02-17T14:31:00.000+01:00

Sist helg var me på Sørlandet. Der trefte me ei lita sjel me ikkje hadde møtt før. Og ho fekk Myk Start-kjole (vest i boka) i svakrosa silkealpakka frå drops. Den litle eigaren bryr seg heilt sikkert om det, men mora kan sikkert vere interessert i at kjolen bør vaskast med andakt (!).

Elles er eg litt i symodus. Har klippa opp stoff til fire puter no. Enkelt og greitt. Passar på ein fredag når helga slår inn.

No står forresten vinterferien òg ute på trappa. Trur eg får gå og sleppa han inn.
God ferie/helg til deg!

Sunday, sunday people

2012-02-05T22:24:00.000+01:00

I dag har me hatt litt slekt på middagsbesøk. Pølser og pizzahorn med salat kunne passa for store og små. Det er rart korleis det er - sjølv om huset var i orden og helgevaska på torsdag, er det mykje som må ordnast før det er presentabelt på sundagen. Lurar på om andre folk òg føler at dei må drive å rydde og vaske så voldsomt i timane før eg kjem på besøk...? For det treng dei ikkje! (Hint hint til de som får helgebesøk av oss snart).

I snøveret var det herleg å halde seg innandørs. Men no kjenner eg at bekymringa kjem snikande om korleis eg skal kome seg på jobb i morgon tidleg dersom snøkrana ikkje vert skrudd av der oppe. Kan fort bli kaos på vegane.

Apropos kaos. Under ser de eit utsnitt av stovegolvet etter dagens party. Det vitnar om eit visst nivå av leikeglede, men òg om eit tilsvarande høgt nivå av etterarbeid.

Vandrande ullteppe

2012-02-04T18:50:00.001+01:00

Hugsar de lista om nyttårsfortsetta mine? Eit av dei var at eg skulle prøve å strikke noko til meg sjølv. Mykje av det som vert produsert her i heimen blir oftast gjevne i gåver. Og det er jo vel og bra. Men no vart det altså strikkaren sjølv sin tur å få eit plagg. Det har vore ei skummel "reise" mot ferdig produkt. Kjolen er langt frå lytelaus, men han heng no saman på eit vis. Undervegs merka eg frykten for at størrelsa skulle bli frykteleg feil. Lenge såg han for stor ut. Og for å sei det slik: Utan at eg hadde laga holrad til å ha tråd i for å strama inn kjolen, trur eg det hadde vore snakk om ein stor alpakkafiasko. Han er nok i største laget. Men heldigvis funkar det greit å bruke ei eller anna form for snor eller belte.

Ganske så direkte inspirasjonen til å lage denne, fekk eg i eit innlegg på bloggen Hekta på strikk. Innlegget hadde eg lagra som bokmerke for ei stund sidan, og fann det att seint i haust då det var tilbod på Drops Alpakka. Tusen takk, Siren for den gode ideen om å gjere om oppskrifta frå jakke til kjole! Jakka det er teke utgangspunkt i, finn de her.

Med dette plagget i boks, er det allereie eit nytt på gang. Denne gongen med nøstebarngarn og pinne nr. 2,5 og 3. Går litt seinare, kan du sei. Men som eg har sagt før: Alt har sin tid.

God lørdag! Eg skal ut og erobra vinterkvelden i ullteppet mitt.

I det royale hjørnet

2012-01-31T20:57:00.000+01:00

Me har ganske nyleg ommøblert litt i stova. Det skal ikkje så mykje til for å få eit nytt perspektiv på livet. Eg fekk ein lys (nektar å skrive ljos akkurat no) idè om å dra ned uttrekkssenga frå loftet. I utgangspunktet har eg hatt ein draum om å ha ei slik seng på kjøkkenet, men sidan det noverande kjøkkenarealet legg ein dempar på realismen i dette, får senga gå og finna seg andre jaktmarker. Etter vel eit år på gangen på loftet, har ho no kome ned og inn i varmen. Så no har store og små ein triveleg leseplass. Den overhangande faren er å hengje seg fast på midten når ein er ferdig med bibliotektimen. Kong Haakon har ingen planar om å gå ned frå senga. Derimot har han planar om å flytta seg litt lenger opp på veggen. Og då treng han hjelp av ein av undersåttane sine. Og slikt kan ta tid.

Fjosbuksetass med ansvar for gul løe

2012-01-21T22:20:00.000+01:00

Innimellom mine to (aktive) strikkeprosjekt (kjole til meg + barselgåve-kjole), er det kjekt å sveiva i gang symaskina. Etter at eg kjøpte Janomen i haust, har syinga vorte meir og meir lystbetona. Jippi! I denne veka vart ei velurjoggebukse fødd. Enno litt stor til han som er målgruppa (som de ser). Men normalt sett vil jo smågutar vakse til, så eg stressar ikkje direkte med det. Eg tok utgangspunkt i eit mønster i o store børnetøj-boka (lurar på om det heitte elastikbukse??). Fjoset som er med som statist på bileta, er (fjor)årets julegåve til joggebuksemodellen. Kjøpte det på gjenbruksbutikken og pussa det opp med nye fargar. Så her i garden blir det ikkje gjort skilnad på kamel, høne, sau eller elefant. Alle skal på bås uansett om dei kjem frå Noas ark eller julekrubba. Fint det, eigentleg. Dei er sikkert glad for å få endeleg å koma i hus.

Kalendar: for dei som ikkje har meir plass bak øyra

2012-01-12T21:27:00.000+01:00

Kjøpt på Lola's room

2012 er godt i gang. Og ein treng ikkje studera kalendaren for å merke at tida flyg. Likevel kan det vere greitt med ein kalendar. No etter eg har starta så smått på jobb att, ser eg at eg meir og meir vert avhengig av å vite kva dato det er og kva vekedagen heiter. Til og med vekenummer (som eg under studietida aldri brydde meg om), vert viktige når ein skal lage vekeplanar for elevane. Jaja, nok smalltalk om kalendarar. Her er kalenderfangsten min frå o store Etsy. To vart gåver, og ein har eg sjølv på kjøkkenet.

Kjøpt på OliveandRuby

Kjøpt på Square paisley design

På Etsy er mange av kalendarane no på salg. Og det er jo fint for dei som ikkje har kontroll på dato og vekenummer og slikt. Sist eg sjekka var det både mange veker og dagar igjen av året.

På tampen av jula

2012-01-02T19:51:00.000+01:00

Juletrepynten heng bokstavleg talt i ein tynn tråd her i huset. Men eg trur ikkje han må gå i hi i kveld. Fekk knipsa litt av dei øvste julemarknadskulene som ikkje blitt plukka av med hjelp av yngre krefter i løpet av jula. Ikkje så mykje heimelaga her - utanom candy cane'ane og fine hekla snøkrystallar laga av ei venninne.

Det er løye (rart/merkeleg) at det er så stor skilnad på at noko som kan vere så kjekt å pakka ut, kan vere så til dei grader kjedeleg å pakka ned att. Trur eg drygar til i morgon og heller fokuserer på det femte kulepunktet av crafting-nyttårsfortsetta mine i kveld.

Nytt innlegg, nytt år og nye sjansar

2012-01-01T13:27:00.000+01:00

Godt nyttår!!
Eg tykkjer det er godt at det på ein måte finst nokre avsluttingar og byrjingar i løpet av livet. Naiv (?) som eg er, trur eg at me med eit nytt år òg får nokre nye sjansar til å gjere noko annleis enn året før. Og kanskje betre, dersom det er mogleg. Sjølv om den siste dagen av året i fjor er ganske så lik den fyrste dagen i dette året, sit eg no med litt meir mentale blanke ark enn i går. Det er no vi kan vere glad for at vi (i alle fall eg) ikkje støttar meg til determinismen som trur at ting ikkje kan endrast.

Ein del pakka med nyttårsfortsett og alt det der, er jo å til ein viss grad innsjå at ikkje alt i løpet av året går som planlagt. Men det tenkjer me ikkje på i dag!

På crafting-området har eg òg nokre ambisjonar får året. Så vil det vise seg kor mykje eg dreg i hamn

Eg vil prøve å setje av meir tid til å sy. Dette året kan eg ikkje klaga på at eg ikkje har god symaskin. Den kom i fjor haust. Haugen med stoff frå Stoff og stil talar vel òg for seg sjølv. I haust var eg på sykurs med ei venninne. Hadde vore kjekt å ta nokre sykveldar i lag.
Eg vil prøve å planleggje barselgåver i litt god tid. Trass alt har ein gjerne fått vite at venninna er gravid minst 6-7 månader før ungen kjem...
Eg vil prøve å byrje å starte julegåveproduksjonen før juni. Rart korleis det blir. Trådane vert festa på kvelden 15.desember slik at eg akkurat på tampen når posten sin pakkefrist den 16.
Eg vil (igjen) prøve å tære på restegarnet mitt!
Eg vil prøve å strikke (litt) meir til meg sjølv. Og då tenkjer eg ikkje berre huer og vottar og slike småplagg. I skrivande stund har eg faktisk ein kjole til meg sjølv på pinnane, så her har eg faktisk allereie byrja godt.

Har du nokre nyttårs-craftingambisjonar? Blogg gjerne di eiga liste (Her kom læraren fram i meg. Liksom: Lag fem "eg vil prøve"-setningar for det nye året. Hehe.).

Og så eit generelt note to self for det nye året:
Ikkje ta fleire studiepoeng.

Shabby eller ikkje? Etsyanske julemerkelappar

2011-12-30T20:08:00.000+01:00

Etsy er gøy. Det har de høyrt før. Eg trur ikkje det er mange i mitt nettverk som aldri har høyrt meg trekkje fram Etsy i ein eller anna samanheng. Og Etsy er nyttig. I alle fall i førjulstida kor ein kan gjere unna litt "julestri" på nettet. I år kom det både ein del julegåver og jule-equipment flygande over både Atlanterhavet, Nordsjøen og kanskje andre sjøar òg. Kva veit vel eg om flyrutene... Kanskje dei tek ein sving over Lappland?

I år la eg planar for julegåvemerkelappar allereie i slutten av november. Valet fall på desse lappane Etsybutikken

Shabby Pea Design.

Sånn stilmessig er eg eigentleg ikkje så shabby, men akkurat desse syntest eg passa godt til gråpapir som innpakkingspapir.

Alle bileta er henta frå Etsybutikken til Shabby Pea Design.

Og så var det berre note to self til neste år:

Bestill merkelappane litt tidlegare enn 20.november slik at skuldrene ikkje går høgare opp enn nødvendig...

Viss Josef og Maria var på facebook...

2011-12-24T16:21:00.000+01:00

Jula er her. Me har vore i kyrkja og høyrt om Han som kom! Tenk viss Josef og Maria var på Facebook. Bruk fire minutt på denne snutten for å kome inn i den rette julemodus. Ønskjer deg ei god jul!

Jul i Fisher Price-land

2011-12-23T01:30:00.000+01:00

Her er avdentsleiken vår. Bestilte denne julekrubba i god tid på Ebay (Grrr. Minnar meg om at eg framleis ventar på snøkrystall-kakeformer som skulle vore brukt i julebaksten...). Som de ser er mest alle dei viktige rollane i juleevangeliet representert. Einaste er gjetarane som manglar til alle dyra. Men Josef liknar jo litt der han står. Me leikar aktivt, så i løpet av desember, har dei forskjellige figurane vore på ferie. Nokon under sofaen, medan andre har teke seg ein tur på badet. Josef har hatt lengst ferie. Det var ei stund eg var redd at Maria måtte skifte alle bleiene, men her om dagen kom han vandrande tilbake, klar for å ta ansvar igjen. Og jammen meg; Like etter hadde dei små hendene teke med seg Maria på ukjent husmorferie! Men som de ser, så kom ho tydeleg tilbake til fotoshooten. På krubbetaket er det ein liten knott kor alle figurane kan setjast. Mor tenkjer det er mest naturleg at engelen står der oppe og syng sitt GLORIA, medan julekrubba sin eigentlege eigar gjerne vil testa ut både "Bæ" og Jesus på taket.

Ei veldig kjekk leike!

GILD i øyra

2011-12-21T22:10:00.000+01:00

I haust har eg, som mange andre her inne, opna ein EPLA. Så no går det i buttons-øyredobbar a la Dolly Duck og Minni Mus. Brukar dei øyredobbar forresten?? Jaja, dei hadde no sikkert brukt desse viss dei hadde hatt hol i øyrene.

DIY: Mjuk juletrepynt

2011-12-18T22:30:00.000+01:00

Me sveivar like godt i gong med ein DIY midt i julestria. Eksamen er over for min del, så det som står att før jul er til å leva med.

Det blir fyrste året med juletre i år. Ein kan spørje seg om det er eg som har har halde meg unna treet, eller treet som har halde seg unna meg No står det i alle fall eit heilt ok tre i garasjen og ventar på å få koma inn. Eller kanskje det skjelv i nålene og håpar på å få sleppe å stå og henge og halde på juletrepynt i eit par veker? Med ein liten trave som spring rundt og dreg ut og flyttar (og knuser) alle ting som står i skap/skuffer og vinduskarmar, skal dette med juletre verte ekstra spanande. Eg må nok innsjå at draumen om å få ta i bruk juletrekulefangsten frå fleire turar på Weihnachtsmarkt i Berlin kanskje ikkje blir oppfylt i år. I såfall må dei hengje høgt. Nedst skal me pepra treet med mjuk pynt som kan drassast rundt i huset opp til tjue gonger om dagen uten at dei har vondt av det. Og det er her sukkertøystavar, eller candy canes om du vil, kjem inn i biletet.

Slik gjer du:
1. Lag eit mønster. Enkelt og greitt. Mitt var ca. 15 cm på langs. Eg teikna sukkertøystaven breiare i begge endane for å få ein slags "slengbukseeffekt". Legg mønstert på skrå på eit raudt- og kvitstripete stoff (eg har kjøpt mitt på Ikea for ei stund sidan). Teikn rundt mønsteret.

2. Sy på streken du har teikna opp. La botnen stå open. Klipp ut staven med omlag ein halv cm ekstra stoff utanfor saumen.Vreng. Bruk gjern ei litt tjukk heklenål til dette.

3. Fyll med vatt. Brett inn kanten nede og sy saman.

4. Heng stavane nedst på juletreet slik at små hender kan stikke av med dei utan at noko skade er skjedd.

Pom poms united

2011-10-28T20:30:00.000+02:00

Me får ta det som eit godt teikn at det er/har vore stilt her inne. Me får seie det slik at me i haust har andre ting å drive med enn å henge timevis på nettet og blogge. Litlegut har runda året. Det er over ein heil månad sidan faktisk. Me gira på med to selskap midt i ei travel veke. Note to self: Legg selskapa til ei helg neste år... Det vart svensk fargetema med rutepapir på bordet og pom poms i taket.Vitskapen om pom poms er eit forholdsvis nytt fenomen her i heimen. På youtube ligg det ørten videosnuttar om korleis dei lagast. Blant anna denne. Minuset med å ha pom poms over bordet, er at ein ikkje kan ha høge lys tent under... Eller teoretisk sett kan ein jo, men me vil heller ha selskap enn å slokke brann.

Bill.mrk: Bamse søkjer full merksemd

2011-09-19T18:06:00.001+02:00

Denne karen har flytta inn i huset. Kom inn som lange Drops Paris-trådar, men jammen meg har han fått knytta seg saman til ein liten kropp. Det likevel er ikkje så lenge han får sitje i vindauge og følgje med på det dynamiske nabolaget. Han skal pakkast inn og koma ut igjen i heimen når litlemann fyller 1 år om ikkje så mange dagane. Eg håpar at dette kan bli favorittbamsen (i staden for den "flyssa" han har no). Med denne kan me jo laga klede slik at han kan bytta stil i ny og ned. Det er litt verre med "flyssa" som kun er eit bamsehovud festa på ein klut.... Nokon som har erfaring med sauehald? Dersom ein sau har trillingar og ein sau som kun har eit lam, kan ein prøva å få den sauen som har tre til å adoptera vekk eit til han med med det eine. Denne prosessen med å "vengje under" inneber å få adoptivlammet til å lukte slik at sauen blir lurt til å tru at det er sitt eige.

Eg er enno i tenkjeboksen om korleis eg skal få same innbarka lukt i denne bamsen som i den noverande flyssefavoritten... Tips?

Litt fakta på tampen:
Pinne: 4,5 (sokkepinnar)
Garn: Drops paris, ganske nøyaktig to nøster
Oppskrift: Isbjørnen Otto, kjøpeoppskrift på Ravelry
Comment: Så godt som ingen montering. Bra!

....Then we take Berlinnn

2011-09-16T21:53:00.001+02:00

Sidan sist har dette hendt: Kamera har vore på reparasjon, eg har vorte student og me har vore på ferie i Berlin.

Alt utanom det midterste er no i boks, fullført og i orden. Studielivet strekk seg naturleg nok over heile hausten. Utfordring å få til å vere både fulltidsstudent og fulltids stay-at-home-mum. Men alt går på eit vis, og kveldane har i det siste blitt brukt meir til lesing og oppgåveskriving enn til kvalitetstid med strikkepinnane. Litt har det vel blitt. Kjem ikkje på noko akkurat nå (...dårleg teikn). Det eg veit, er at eg har ein søt ein, som heng fast i bambuspinnar nr. 4,5. Han manglar øyre og ein arm. Vent og sjå!

Bilda overfor er frå Berlin, kjekkaste storbyen i Europa. Har vore der fire gonger no (3 gonger på langhelger). Denne siste vart oval i begge ender. Gøy for store og små! Turen vart bestilt rundt ei halv veke før me reiste. Akkurat det trur eg kan karakteriserast som rimeleg impulsivt... Eg koste meg med Balzac coffee på kvart gatehjørne. Me leide blant anna syklar i Potsdam og susa gjennom flotte parkar med store slott. Anbefalast. Sykkeltralle til minstemann hadde dei òg.

Eg hadde tenkt meg innom stoffbutikken til Frau Tulpe, men det vart det dessverre ikkje til. Jaja, så lenge Norwegian har direkterute frå Sola til Berlin, er det vel berre å slå til igjen.

Verdas søtaste selebukseoppskrift: On the Go-verall

2011-08-17T21:22:00.000+02:00

Ravelry er og blir eit utømmeleg hav av fine oppskrifter. På under ei veke har ein On the Go-verall blitt prestert ut av forholdsvis tjukke pinnar. Herleg når ting går fort! Og eg har ikkje direkte sete 24-7 og strikka. Eigaren av dei nye buksene er vel heller han som me brukar tida på. Alt skal sjekkast ut, vaskemaskinen inkludert.

Litt facts:
Selebuksa er strikka i Drops Nepal (blanding av ull og alpakka - trur garnet passa ganske så godt til oppskrifta.). Brukte pinnee nr. 5,5. Til str. 12-18 mnd brukte eg 5 nøster. Buksa finst i størrelsar frå nyfødd til 3 år. Og det beste av alt - oppskrifta er gratis (free ravelry download). Eg har strikka selane litt lange, slik at eg kan flytta knappane når det trengs. Føreløpig kan rillekanten nedst vere oppbretta. Då har me nokre centimeter å gå på den vegen òg. Kjekt det. Tida står jo liksom ikkje stille.

Som hjelp til å forstå oppskrifta (som er på engelske), brukte eg denne sida.

Takk til dama (mest sannsynleg...) som har delt denne fine oppskrifta med oss alle! Eg er kjempegira på å strikka fleire, gjerne i friskare fargar. Knappane er sponsa av ei forenings-/barseltreffvenninne. Takk for djupdykket i farmorknappane dine!!

Duskehue til ein liten ny ven

2011-08-12T17:50:00.000+02:00

Litletassen har testa ut ei hue for meg. Han måtte liksom sjekka om ho funka i oppoverbakke. Trapper er tingen for tida. Kjekt med trappegrinder (dersom ein hugsar å lukke dei att...) Mottakaren er ein nesten-namnebror som er hakket yngre (og mindre). Veldig søt type, etter det eg har sett på bilete. Hua er av typen lettstrikka babylue i ullsilke frå Nøstebarn.

Fadderbarnet vårt har det best (?) med MILOvest

2011-08-08T18:29:00.000+02:00

På ei Ravelry-runde tidlegare i sommar, kom eg over Milovesten. Eg var ute etter ei gåve til ei god jente som skulle fylle to år no i august. Og i haugane mine med garn, var det ikkje vanskeleg å finna ein fin fargekombinasjon både eg (og forhåpentlegvis det søte fadderbarnet mitt) kunne leve med. Eg skippa altså mønsterfletta og satsa på fargemønster i staden. Er godt nøgd med det. Ein får håpe at eg ein annan gong får "giren" til å følgje mønsteret til punkt og prikke. Oppskrifta inneheld framgangsmåte på vestar frå str. nyfødd til 6 år, så her er det mogleg å kle opp alt og alle som ikkje har vore borti Kunnskapsløftet (ja, seksåringane er vel einaste unntaket, då). På grunn av garntjukkelse og dermed óg tjukkare pinnar (tippar 4,5), vart 9 mnd-oppskrifta tilsvarande 2 år. Vesten er no kome rette vedkommande i hende. Satsar på suksess i barnehagelivet!

2011-07-23T20:47:00.000+02:00